అనాథ బాలల జీవితం
ప్రపంచాన ఉదయించిన బాల్యం
అస్తమించే సూర్యునిలా వాలిపోతూ ఉంది
ఏ కన్నతల్లి విసరి వేసెనో
ఏ అయ్య వదలివేసెనో
ముక్కుపచ్చలారని చిన్నారిబాల్యం -
జన జీవనంలో కృంగిపోతూ ఉంది!!
రైళ్ళలో జనం తినగా వదలినదే-
వారి ఆహారం,ఫ్లాట్ ఫారమే పట్టె మంచం!
బస్టాండ్ లో బరువులు మోసే -
వీరి చేతులు,
ఒక పూట కూడ ఫుల్ భోజనం
చేయలేని కాలే కడుపులు!
విధి వక్రించిన వీరి జీవితాలకు
గ్రహణం తొలగేరోజులు లేవా!!
అధికారములో ఉన్న పెద్దలారా!
ఆదరించే ఆంధ్రులారా!
మసివాడిన పసివాళ్ళను
ఆదరించండి!
మానవతా హృదయంతో అక్కున చేర్చుకోండి!!
-
పాపం పసి వాళ్ళు
పాల బుగ్గల పసి వాళ్ళము
ఎగిరి గంతులేసే లేగదూడలం
ఆకసాన మిరుమిట్లు గొలిపే తారాజువ్వలం
అందరిలా ఆటలాడే వయసేమాది
అమ్మ చేతి ముద్ద తినాలనే ఆశే మాది
కానీ మేం విధి వంచితులం...విధివంచితులం
ఎన్నో ఆశలు ఎన్నో కలలు కంటూనే ఉంటాం-
గొప్పోళ్ళ పిల్లల్ని ఆడిస్తూ,పాడిస్తూ,పనిచేస్తూ....
అమ్మా,నాన్నల తోడు లేక, ఆకలితో అలమటిస్తూ..
వెట్టిచాకిరి చేస్తూఉంటాం... చేస్తూచేస్తూఉంటాం..!
మా చుట్టూ అన్నీ ఉన్నా..కానీ మాకు ఏవీ అందవు
అర చేతిలో బొబ్బలు,కాళ్ళమీద వాతలు తప్ప !!
కన్నీటిధారలు,చింపిరి జుట్టు, మాసిన బట్టలు-
ఆవిరౌతున్న మా బాల్యానికితిరుగులేని గుర్తులు !
అందరి పిల్లల్లా మమ్మల్ని చూడండి
పని పిల్లలమని పాపం తలచండి !!......
తెలుగు భాషా దినోత్సవ సందర్బముగ
వందనం వందనం తెలుగు భాషకు వందనం
శుభదినం,శుభదినం మాతృభాషకు శుభదినం
తేనెలొలికే తెలుగుభాషకు,ఏది సాటి లేదురా
అందమైన మాతృభాషకు ఏది పోటీ కాదురా:
అలనాడు రాయలవారి మాట దేశ భాషలందు తెలుగులెస్స!
తమిలనాట కవి సుబ్రమణ్య భారతి మాట సుందరతెలుంగు!
నాటి నన్నయ నందనవనంలో వికసించిన తెలుగుపదాలు
నేటి శ్రీశ్రీ కవితా ఉప్పెనలో ఎగసి పడిన తెలుగు పదగర్జనలు!
కవిసామ్రాట్ కవిత్వంలో కదంతొక్కిన తెలుగు కవితా ఝరులు
ఝాషువా చేతిలో జాలువారిన జన తెలుగు పదాలు!
అల్లసాని వారి అల్లికలు, తెనాలి వారి తికమకలు
తేట తేట తెనుగుల మధుర రసాలు
నందమూరి వారి సంభాషణా చాతుర్యాలు
నలు దిక్కుల వ్యాపించెను తెలుగు భాషా వెలుగులు!
నేడు గిడుగు రామ్మూర్తి జన్మదినం
తెలుగు భాషకు పునరంకితదినం!!